Həyat ya cəsarətli bir macəradır, ya da heç nə.

ESTP xarakter tipli insanlar (Sahibkarlar) coşqulu və spontan enerjiləri ilə seçilirlər. Onların rəqabətçi tərəfi güclüdür və özlərini uğura aparan yolda rəqabət düşüncəsini vacib sayırlar. Çox zaman keçmiş barədə düşünməyə vaxt itirmir, anı yaşamağa diqqət kəsilirlər. Gün ərzində zamana baxmaq belə bəzən onların yadına düşmür – bütün diqqətləri “indi”yə yönəlib.

Nəzəriyyə, abstrakt konseptlər və uzun-uzadı qlobal müzakirələr çox zaman ESTP-lərin marağını tez itirir. Onlar söhbətlərin enerjili və əyləncəli olmasını, üstəlik ağıllı məzmun daşımasını sevir, lakin daha çox real fəaliyyətdə olmağı seçirlər. Tez qərar verib, səhvləri yolgedə düzəltməyə üstünlük verirlər, əvəzinə uzun müddət ehtimallarla baş sındırmağı faydasız sayırlar.

Dərhal İşə Başlamaq

Cəsarətli və qorxmaz olan ESTP-lər fürsətləri dəyərləndirməkdən və impulslarını izləməkdən çəkinmirlər. Onlar bu anı yaşayır və açıq fikirli və özünəinamlı şəkildə fəaliyyətə atılırlar. Bu şəxsiyyət tipinə malik insanlar dramı, ehtirası və həzzi emosional həyəcan üçün deyil, zehinlərini stimullaşdırdığı üçün sevirlər. Onlar kritik qərarları faktiki və ani reallığa əsaslanaraq, sürətli rasional stimul-reaksiya prosesi ilə qəbul edirlər.

Bu xüsusiyyətlərə görə məktəb və digər təşkilatlanmış mühitlər ESTP-lər üçün çətin ola bilər. Hərçənd, bu, onların istedadsız olduqları anlamına gəlmir. Sadəcə, möhkəm struktur və uzun-uzadı müzakirələr ESTP-lərə cansıxıcı təsir bağışlayır. Onlar anlayırlar ki, bütün bunlar gələcək fürsətlər üçün zəruri prosesdir, lakin bu prosesi sırf “tələbləri yerinə yetirmək naminə” keçmək onlara çox ağır gələ bilər.

Digər çətinlik isə ondan ibarətdir ki, ESTP-lər başqalarının əxlaq normalarına deyil, öz mənəvi kompaslarına əməl etməyi üstün tuturlar. Qaydalar pozulmaq üçündür. Bu düşüncə tərzi məktəb müəllimləri və ya korporativ rəhbərlərin çoxu tərəfindən bəyənilmir və bu şəxsiyyət tiplərinə müəyyən reputasiya qazandıra bilər. Lakin əgər onlar problemlər yaratmağı minimuma endirib, enerjilərini düzgün istiqamətləndirər və darıxdırıcı işlərə də diqqət yetirərlərsə, ESTP-lər hesablaşılması vacib olan bir qüvvəyə çevrilirlər.

Az Gedilən Yolla İrəliləmək

ESTP-lər, demək olar, ən iti və senzurasız nəzərə sahibdirlər və kiçik dəyişiklikləri görmək qabiliyyətləri ilə seçilirlər. Üz ifadəsindəki dəyişiklik, geyim tərzindəki yenilik və ya pozulmuş vərdiş olsun, bu şəxsiyyət tipinə malik insanlar başqalarının heç bir şey görə bilmədiyi yerlərdə gizli düşüncələri və motivləri dərhal anlayırlar. Onlar bu müşahidələrindən dərhal istifadə edir, başqalarını narahat etsə belə, dəyişiklikləri dilə gətirir və suallar verirlər. ESTP-lər olduqca birbaşa və açıqsözlüdürlər.

ESTP xarakter tipli insanlar ehtiras və enerji ilə dolu, bəzən diqqəti yayınsa da rasional düşüncəyə malik insanlardır. İlhamverici, inandırıcı və rəngarəng olan bu insanlar, təbii qrup liderləridir – hamını az gedilən yollarla aparır, getdikləri hər yerə həyat və həyəcan gətirirlər. Onların əsl çağırışı bu keyfiyyətləri konstruktiv və səmərəli nəticələrə çevirməkdir.