Намайг чиний амьдралын төлөө юу хийдэг чинь сонирхохгүй. Харин чи юуны төлөө тэмүүлж, зүрхний хүслээ биелүүлэх зоригтой юу гэдгийг мэдмээр байна.

ENFP (Идэвхтэн) зан чанартай хүмүүс бол жинхэнэ эрх чөлөөний сүнс – нийтэч, халуун дулаан сэтгэлтэй, нээлттэй үзэлтэй. Амьдралд өөдрөг, эрч хүчтэй хандах энэ хүмүүс хаана ч байсан бусдаас ялгардаг. Гэвч тэд зөвхөн зугаа цэнгэлд анхаардаггүй – бусадтай чин сэтгэлийн холбоо тогтоох, гүн гүнзгий утга учрыг хайх нь тэдний амьдралд туйлын чухал.

Өдөр тутмын амьдралын ид шид

ENFP зан чанартай хүмүүс сонирхолтой хоёрдмол шинжийг агуулдаг: нэг талаар нийтэч, баяр хөөртэй, гялалзсан төсөөлөл, нөгөө талаар гүн бодлогошронгуй, дотоод ертөнцдөө эрэл хайгуул хийдэг. Тэд энэ сониуч зан, өргөн цар хүрээтэй сэтгэмжээрээ өөрийгөө болон хүмүүс хоорондын харилцааны нарийн төвөгтэй байдлыг илүү сайн ойлгохыг оролддог. Мөн тэд харилцаа холбоогоо бэхжүүлэх, дэлхий ертөнцийг ойлгоход бүх л сэтгэл зүрхээрээ зүтгэдэг.

ENFP хүмүүсийн энэ өөрийнхөөрөө бодлогошронгуй байдал нь логик, учир шалтгаанаар тайлбарлагдахгүй зүйлийг ч итгэл, гайхамшиг гэж хүлээж авах сонирхлоос нь урган гардаг. Тэд хүн бүр хоорондоо гүн гүнзгий холбоотой гэж итгэдэг бөгөөд тэдгээрээс олж авах таньж мэдэхүйн гялбааг эрэлхийлдэг. Тэд бид бие биетэйгээ хэрхэн харьцаж буй нь үнэхээр чухал гэдэгт итгэдэг. Үнэндээ ENFP хүмүүс бусад хүн төрөлхтнөөс илүүтэйгээр үйлийн үрийн ухаанд итгэдэг.

Тэдний төсөөллийг өдөөх ямар нэгэн зүйл тохиолдоход, ENFP-үүд бусдыг халдварлах мэт урам зоригтой болдог. Эдгээр зан чанартай хүмүүс бусдыг өөртөө татах эерэг энергийг цацруулахгүй байж чаддаггүй. Үүний үр дүнд тэд хамт олныхоо удирдагч эсвэл зөвлөгч хэмээн хүлээн зөвшөөрөгддөг. Гэвч анхны урам зориг нь намжсаны дараа ENFP-үүд өөрийгөө сахилгажуулах, тууштай байдлаа хадгалахад хүндрэлтэй тулгардаг бөгөөд нэгэн цагт өөрт нь маш их утга учиртай байсан төслүүдээ орхих хандлагатай.

Баяр баясгаланг эрэлхийлэх

ENFP хүмүүс амьдралын баяр баясгаланг эрэлхийлэх нь өнгөц зүйл биш гэдгийг харуулдаг. Тэд нүд ирмэхийн зуур халуун сэтгэлтэй идеалист байснаа бүжгийн талбай дээрх санаа зоворгүй дүр болон хувирч чаддаг.

Хөгжилтэй үед ч гэсэн ENFP-үүд бусадтай сэтгэл санааны холбоо тогтоохыг хүсдэг. Эдгээр хүмүүст өөрсдийн хайрладаг хүмүүстэйгээ чин сэтгэлийн яриа өрнүүлэхээс илүү чухал зүйл цөөхөн байдаг. ENFP-үүд хүн бүр өөрийн сэтгэл хөдлөлөө илэрхийлэх эрхтэй гэж үздэг бөгөөд тэдний энэрэнгүй, дулаан зан нь хамгийн ичимхий хүмүүс ч гэсэн сэтгэлээ нээж чөлөөтэй ярих боломжийг олгодог.

Гэхдээ ENFP хүмүүс болгоомжтой байх хэрэгтэй. Тэдний зөн совин нь бусдын үйлдэл, зан байдлыг хэт их тайлбарлахад хүргэж болзошгүй. Шууд асууж тодруулахын оронд тэд бусдын хүсэл эсвэл санаа зорилгыг таах гэж толгой сүүдэрдэг. Энэ төрлийн нийгмийн дарамт нь эв найрамдалд анхаарал хандуулдаг ENFP зантай хүмүүсийг шөнөжин нойргүй хөрвүүлдэг.

ENFP хүмүүс амьдралынхаа зөв замыг олох хүртлээ янз бүрийн харилцаа, мэдрэмж, санаануудыг судлахад их цаг зарцуулдаг. Харин эцэст нь өөрсдийн замаа олсон үед тэдний төсөөлөл, өрөвч сэтгэл, зоригтой байдал нь зөвхөн өөрсдийнх нь төдийгүй эргэн тойрны ертөнцийг гэрэлтүүлж чаддаг.