Sevgi faqat ulashish orqali oʻsadi. Boshqalarga berish orqali siz oʻzingizga bundan ham koʻproq ega boʻlasiz.

ISFJlar (Himoyachi) — kamtar va koʻp eʼtibor talab qilmaydigan koʻrinishiga qaramay, dunyoni aylantirib turadigan insonlardandir. Bunday mehnatsevar va fidoyi shaxslar oʻz atrofiga chuqur masʼuliyat tuygʻusi bilan yondashadi. Ular muddatlarga eʼtiborli, tugʻilgan kunlar va maxsus sanalarni yodda tutadi, anʼanalarni saqlab qoladi hamda yaqinlarining farovonligi uchun astoydil harakat qiladi. Ammo ular qilgan ishlariga eʼtibor talab qilmaydi, aksincha parda ortida ishlashni afzal koʻradi.

Bu — qoʻlidan ish keladigan, “men uddalay olaman” deydigan shaxsiyat turi boʻlib, hissiy va gʻamxoʻr boʻlish bilan birga, juda ham aniq tahlil qilish qobiliyatiga ega. Ular vazmin tuyulsada, odatda yaxshi rivojlangan odamlarga xos ijtimoiy koʻnikmalar va mustahkam doʻstlik rishtalariga ega. ISFJlar shunchaki “oddiy” insonlardan emas – ular koʻp qirrali ijobiy jihatlari bilan hatto eng mayda kundalik vazifalarda ham porlab turadi.

Sadoqat Inʼomi

ISFJlarning eng katta kuchlaridan biri bu – sadoqatdir. Ular deyarli hech qachon shunchaki eʼtiborsizlik tufayli munosabatlar uzilishiga yoʻl qoʻymaydi. Aksincha, doʻstlari va oila aʼzolari bilan doim mustahkam rishtalarni saqlashga intiladi. Ular “Ahvoling yaxshimi?” kabi oddiy soʻrovlar bilan cheklanib qolmasdan, sevikli odamlari qiyin vaziyatga tushganida hamma ishni tashlab, yordamga shoshilish bilan tanilgan.

ISFJlar oʻz atrofidagilarni qoʻllab-quvvatlash va ularga yordam berishdan quvvat oladi. Shuningdek, ular sodiq inson sifatida nafaqat yaqinlariga, balki hamjamiyatiga, ish beruvchisiga va oilaviy anʼanalariga ham xiyonat qilmaslikka intiladi. Biroq bu fidoyilik va xizmat qilish ishtiyoqining ham salbiy tomonlari bor.

Boshqalar ISFJlarning mehnatsevarligi va yordamga shay turishini oʻz manfaatiga ishlatishi mumkin, natijada ular oʻzlarini holdan toygan va haddan tashqari ishlaganday his qilishadi. Bu shaxslar “yoʻq” deyishni yoki oʻzgarishlar kiritishni – hatto zarur oʻzgarishlarni ham – oʻylasalar, oʻzlarini aybdor his qilishlari yoki xavotirga tushishlari mumkin. Bu oʻzgarishlar ularning oʻzlariga, munosabatlariga yoki ilgari qilib kelgan ishlariga tegishli boʻlishi mumkin.

Eng Yuqori Mezonlar

ISFJlar uchun “yetarli” degan tushuncha kamdan-kam hollarda yetarli hisoblanadi. Bu shaxs turidagi odamlar mukammallikka intilish darajasida sinchkov boʻlishadi. Ular oʻz majburiyatlariga juda jiddiy yondashib, doimo kutilganidan ham ortiqroq natija koʻrsatish uchun qoʻllaridan kelgan barcha ishni qilishadi.

Qanchalik mehnatkash va izchil boʻlmasin, ISFJlar kamtarinligi bilan tanilgan. Ular qilgan ishlarini koʻz-koʻz qilishni yoqtirmaydi, bu esa ularning baholanmasdan qolishidan norozi boʻlmasliklarini anglatmaydi.

ISFJlar muvaffaqiyatlarini eʼtirof etmasligi mumkin, ammo bu ularning eʼtibor yoki minnatdorchilik kutmasligini anglatmaydi. Agar ular oʻz huquqlarini himoya qilishni oʻrganmasalar, bu shaxs turi vakillari asta-sekin shijoat va motivatsiyasini yoʻqotib, oʻzlarini qadrlamaydigan odamlarga nisbatan norozilik his qila boshlashlari mumkin.

Boshqalarga – va Oʻziga Ham – Yordam Berish

Garchi ular Introvert boʻlsa-da, ISFJlar ich-ichidan juda ijtimoiy. Ular birovning hayotidagi mayda-chuyda detallarni eslab qolishi, barchaga oʻzini anglab turish hissini baxsh etadi. Qaysi sanada nima sodir boʻlganini aytib bera olishdan tortib, eng munosib sovgʻani topishgacha – bu ishlar ularning hunariga aylangan.

Fidoyi va mulohazali ISFJlar atrofidagilarni quvontirish, ularga xavfsiz va osoyishta hayot barpo etishda yordam berishdan cheksiz mamnun boʻladi. Ular oʻzlari uchun ham xuddi shunday mehr va gʻamxoʻrlikni namoyon etsagina, yanada koʻproq yaxshi ishlar qilishga kuch va ragʻbat topa olishlarini bilishi kerak.