Oʻzbekcha Oʻzbekcha
Rahbar

ESTJ shaxsiyat turi

Rahbarlar – narsalar yoki odamlarni boshqarishda tengsiz ajoyib tashkilotchilardir.

ESTJ shaxsiyat turini (Ijrochi) tasvirlagan sahna. Ayol ESTJ ofis muhitining markazida ishonch bilan turadi, atrofida esa stollar atrofida o’tirgan uchta xodimi bor. ESTJ samaradorlik va vaqtni boshqarishga e’tiborini qaratganligini anglatuvchi sekundomer ushlab turibdi. Xodimlarning hushyor qiyofalari ESTJ yo’nalishiga e’tiborli ekanliklarini ko’rsatadi. Stollar saranjom qatorlarda joylashtirilgan, bu esa ESTJ rahbarlik uslubining tartibli va uyushgan tabiatini aks ettiradi.
E Ekstravert S Kuzatuvchan T Mantiqiy J Rejali

Rahbar

Yaxshi tartib barcha narsaning asosidir.

Edmund Burke

ESTJ (Rahbar) shaxsiyat turiga ega odamlar anʼanalar va tartibning timsoli boʻlib, toʻgʻri-notoʻgʻri va ijtimoiy jihatdan maqbul yoki nomaqbul tushunchalardan foydalanib oilalar va hamjamiyatlarni birlashtiradi. Halollik va fidoyilik kabi qadriyatlarni oʻzida mujassam etgan ESTJ shaxslar murabbiylik salohiyati hamda reja tuzib, uni izchil va samarali tarzda amalga oshirish qobiliyati uchun qadrlanadi. Ular murakkab yoʻllarga mamnuniyat bilan bosh bo’lib, ishlar jiddiylashganda ham taslim boʻlishmaydi.

ESTJ shaxslari odobli fuqarolarning odatiy namunasi kabidir: ular qoʻshnilarga yordam beradi, qonunlarni hurmat qiladi va katta eʼtibor bilan qaraydigan hamjamiyat hamda tashkilotlarda har bir odamning faol ishtirok etishini taʼminlashga harakat qiladi.
ESTJ shaxsiyat turi (Rahbar)

O‘rnak bo‘lib yetaklash

Qonun ustuvorligiga va munosib tarzda qo‘lga kiritiladigan vakolatga qatʼiyan ishonuvchi ESTJ shaxslari boshqalarga shaxsiy namuna koʻrsatish orqali yetakchilik qilishadi. Ular fidoyilik, qatʼiyat va dangasalik yoki aldamchilikning har qanday koʻrinishini rad etish bilan ajralib turadi. Agar kimdir “qattiq mehnat inson xulqini shakllantirishning eng yaxshi yoʻli” deb aytadigan boʻlsa, bu shubhasiz ESTJ boʻladi.

Bu shaxsiyat turi atrofidagi voqealardan juda yaxshi xabardor boʻlib, aniqligi tekshiriladigan aniq faktlar dunyosida yashaydi. Oʻz bilimlariga boʻlgan ishonchi sabab, keskin qarshiliklarga duch kelsa ham, ular tamoyillarida qatʼi turadi va nimani maqbul, nimani nomaqbul deb bilishini aniq ilgari suradi. ESTJlarning qarashlari shunchaki boʻsh gap emas – ular eng murakkab loyihalarga ham shoʻngʻishdan choʻchimaydi, ish rejalarini takomillashtirib, ish jarayonini mayda detallargacha saralash orqali hatto eng mushkul vazifalarni ham soddalashtira oladi.

ESTJ shaxslari boshlagan ishini oxiriga yetkazish bilan faxrlanadigan, masʼuliyatli odamlardir. Ularning bunday xislati ularni ishonchli hamda tayanadigan hamkor sifatida namoyon etadi.

Biroq, ESTJlar hech qachon hamma ishni yolgʻiz qilmaydi va oʻzining ishonchliligi hamda mehnatsevarligining aksini boshqalardan ham kutadi. Ular vaʼdasining ustidan chiqadi. Agar turmush oʻrtogʻi yoki hamkasbi malakasizlik, dangasalik yoki, bundan ham yomoni, insofsizlik oqibatida ularning maqsadlariga putur yetkazsa, ESTJlar noroziligini yashirmaydi. Bu esa ularning “murosasiz” yoki “keskin” degan obroʻga ega boʻlishiga sabab boʻlishi mumkin, lekin bunga sabab ESTJlarning shunchaki oʻjarligi emas – ular bunday prinsiplar jamiyatni oyoqda tutadi, deb chin dildan ishonadi.

Yuksakroq masʼuliyat

ESTJ shaxslari uchun eng katta vazifa – hamma ham bir xil yoʻldan yurmasligini yoki bir xil usulda hissa qoʻshmasligini tan olishdir. Haqiqiy yetakchi nafaqat guruhning, balki shaxsning ham kuchini tan oladi va shu tariqa ularning gʻoyalarini keng muhokamaga kiritishga yordam beradi. Natijada ESTJlar barcha faktlarni toʻplashga muvaffaq boʻlib, har kimga maʼqul keladigan yoʻnalishlarda boshchilik qilish imkoniyatiga ega boʻladi.