Menga kasbingiz qiziq emas. Siz nimaga intilayotganingizni, qalbingizdagi armoningizni ro‘yobga chiqarish uchun jur’at topa olganmisiz – mana shu meni qiziqtiradi.

ENFP-lar (Faol) – chinakam erkin ruhlar: ochiqko’ngil, kirishimli va keng fikrli. Hayotga quvnoq, ijobiy yondashuvi bilan ular istalgan davrada ajralib turadi. Ammo ular faqat xursandchilikni o’ylaydigan odamlar emas – bu shaxslarning chuqur ichki dunyosi boshqalar bilan mazmunli, hissiy aloqalar o’rnatishga bo’lgan kuchli ishtiyoq bilan yo’g’rilgan.

Kundalik hayotdagi mo‘jiza

ENFP-lar (Kampaniyachilar) serjilo, xushchaqchaq kayfiyatga ega ekanligi bilan bir qatorda, ichki dunyosida chuqur fikr-mulohazalar va qaynoq his-tuyg‘ular yashiradi. Ular dunyoni, insonlar o‘rtasidagi murakkabliklarni, o‘zlarini va butun odamiyatni tushunishga bo‘lgan sinchkov qiziquvchanligi bilan boshqalardan farq qiladi. Jamiyatni yaxshilash va butun dunyoni anglash istagi ularning hayot mazmunidir.

Mazkur shaxsiyat turlari introspektiv ruhiyati bilan ajralib turadi. Ularning tasavvur, hayrat va ba’zan mantiq bilan tushuntirib bo‘lmaydigan narsalarga bo‘lgan ishonchi behad. ENFP-lar har bir narsa va har bir inson o‘zaro bog‘liq, deb ishonadi va ana shu bog‘liqlikdan kelib chiqadigan saboqlarni juda qadrlaydi. Ular jamiyatda yaxshilik va ezgulik borligiga, o‘zaro munosabatlarimiz qanday bo‘lishi muhim ekani va “karma” – qilgan ishimiz baribir o‘zimizga qaytishiga astoydil ishonadi.

Biror narsa ularning tasavvurini uyg‘otsa, ENFP-lar barchani jalb qiladigan g‘ayratni namoyish etishadi. Atrofdagilar ham ularning tabassum va ijobiy energiyasiga ergashmasdan iloji yo‘q. Natijada, atrofdagilar bu shaxslarni yetakchi yoki ustoz sifatida ko‘ra boshlashlari mumkin. Ammo ma’lum muddat o‘tgach, ENFP-lar diqqatni jamlash yoki intizomni saqlashda qiynalishi, ilgari ular uchun nihoyatda muhim bo‘lgan loyihani ham chetga surib qo‘yishi mumkin.

Quvonch izlash

ENFP-lar – hayot zavqi va quvonchini izlash yengiltaklik emasligining yaqqol isbotidir. Ular bir lahzada o‘ta jo‘shqin idealistdan quvonch bilan raqsga tushayotgan quvnoq insonga aylanib ketishi mumkin.

Hatto eng xush kayfiyatli damlarda ham ENFP-lar yaqinlari bilan chuqur, samimiy muloqotni qadrlashadi. Bu shaxslar uchun do‘stlari va oila a’zolari bilan chin yurakdan suhbatlashishdan muhimroq narsa yo‘q. ENFP-lar har bir inson o‘z his-tuyg‘ularini ochiq aytishga haqli, deb hisoblaydi. Ularning yon beruvchanligi va dilkashligi hatto eng kamtar yoki tortinchoq insonlarga ham o‘zini erkin ifoda etishga imkon yaratadi.

Biroq ularning intuitsiyasi ba’zan haddan ziyod ishga tushib, atrofdagilar harakatlaridan yoki so‘zlaridan jiddiy ma’no izlab ketishi mumkin. Osonroq yo‘l – so‘rab ko‘rish – o‘rniga ENFP-lar birovning istaklari yoki niyatlarini o‘zicha taxmin qilishga berilib ketishi mumkin. Bunday ijtimoiy tanglik ularning uyg‘unlikka intiladigan tabiatini bezovta qilishi va ularni tunlari bedor qoldirishi hech gap emas.

ENFP-lar o‘z hayotida ma’no va maqsad izlash uchun turli munosabatlar, his-tuyg‘ular va g‘oyalarni diqqat bilan o‘rganishga qancha vaqt sarflashmasin, ular ohir-oqibat “to‘g‘ri” yo‘lni topishadi. O‘z tasavvuri, hamdardligi va jasorati bilan ENFP-lar nafaqat o‘z hayotini, balki atrofni ham yoritib, boshqalarga ilhom bag‘ishlashi mumkin.