Тез ойлайтын әрі тәуекелшіл ENTPs (Дебатшылар) – қалыптасқан жүйемен келіспеуден тайсалмайды. Тіпті олармен келіспей қалатын нәрсенің өзі көп болуы мүмкін. Бұларды азғырған дүниенің бірі – сөз таластыру; ал ол талас даулы тақырып айналасында болса, тіпті қызық.

Десе де, бұл ENTPs-ті келіспейтін немесе қаскүнем деп ойлау қате болар еді. Керісінше, бұл тұлға иелері білімді әрі құштар, ойнақы әзіл-оспағы бар және өте көңілді бола алады. Олар үшін қызық – әдеттегіден тыс, қарсы пікірде болу, әсіресе қызу пікірталасқа түсу.

Ережелерді бұзу

«Қауіпті, тәуелсіз ойшылдың жолымен жүр. Идеяларыңды талас-тартыстың қатеріне таста».

ENTPs-та бүлікшілдік сипат басым. Олар үшін ешқандай сенім күмән келтірілместей қасиетті емес, ешқандай идея абсолютті емес, ережені де тексеріп көруге болады деп санайды. Бұл ENTP тұлғаларын тым менмен немесе қарсыласқыш етіп көрсетуі мүмкін, бірақ негізінде олардың шекараларды сынап көру әдеті жаңашылдық пен өзгеріске деген ұмтылыстарымен байланысты.

Олардың пікірінше, адамдардың көпшілігі жетекшінің айтқанын көзжұмбайлықпен орындап, әлеуметтік нормаларға бағынады. Ал ENTPs көпшілік мойындаған ойға күмән келтіруден және ерекше, сирек байқалатын идеялардың құндылығын ашудан ләззат алады. Олардың белсенді ақыл-ойы басқалардың қалыпты деп қабылдайтын дүниелерін қайта қарауға және оларды жаңа бағытта дамытуға итермелейді.

ENTPs ауқымды идеялар мен ойларымен жарқ еткенді жақсы көреді, бірақ бұл идеяларды жүзеге асырудағы «қара жұмыс» оларға онша ұнамауы мүмкін және кейде басымдықтар тізіміне кірмей қалады. Өйткені олардың ойында көп ұсыныс бар, ал бәрін бірдей жүзеге асыруға уақыт тар. ENTPs өз мақсаттарын анықтап, оларды орындауға бел бууды үйренбесе, өз әлеуетін толық ашуға қиналуы мүмкін.

Қарама-қайшылықтың бағасы

ENTPs пікірсайысқа өте қабілетті, бірақ бұл әрдайым пайдалы деген сөз емес. Олар жиналыста бастығына ашық түрде күмән келтіргенде немесе өз серіктесінің әр сөзін талдаған кезде, өздерін таза логика мен рационалдылықтың қорғаны ретінде сезінуі мүмкін. Бірақ кейде осының өзі олардың жетістік пен бақыт жолында кедергі келтіріп, достардан айырылуға апарып жатады.

Кез келген тақырыпта үнемі қарсы шыға беру – әр ортада жараса бермейді. Адамдар өз сенімдерінің үнемі сұрақ астында қалғанын көргісі келмейді, сезімдері еленбегенде одан бетер шаршайды. Соның салдарынан, ENTPs шағын қызық үшін таласып жүріп, байқамай талай көпірді өртеп жіберуі мүмкін. Оларды білімділігі, батылдығы, ой-өрісі және әзіл-қалжыңымен мақтаса да, кішкене болса да сезімталдықты дамытпаса, жақын достарымен байланыс орнату немесе мансаптық мақсаттарға жету қиын болуы мүмкін.

Уақыт өте келе көптеген ENTP тұлғалары өздерінің мінсіз өмірі басқа адамдармен байланысты екенін және дауларда “жеңіске” тым көп күш жұмсау, өмірде қалаған жеріне жету үшін қажетті қолдаудан айырылу екенін түсінеді. Жақсы жаңалық – бұл тұлға иелері өздерінің қайшылық тудырушы, жаңа идеялар ұсынғыш мінездерін ешқашан жоғалтпайды. Олар өздерінің ақыл-ой икемділіктерін басқа адамдардың көзқарастарын түсініп, зерттеуге және логика мен прогреспен қатар ізгілік пен ымыраның құндылығын мойындауға қолдана алады.