Жақсы тәртіп – барлық нәрсенің іргетасы.

ESTJ (Атқарушы) тұлға түріндегілер – дәстүр мен тәртіптің тірегі, ненің дұрыс, ненің бұрыс және ненің қоғамға қолайлы екенін терең түсініп, отбасылар мен қауымдастықтарды біріктіре алады. Адалдық пен өз ісіне берілгендікті бағалайтын бұл адамдарды өзгелер бағыт-бағдар беруші ретінде және жоспарларды тиімді әрі ұқыпты жүзеге асыра алатын қабілеті үшін сыйлайды. Олар қиын жолдарда қуана көшбасшылық етеді және қиындық туған сәтте де берілмейді.

Үлгі бола отырып басқару

ESTJ тұлғалары заң мен лайықты түрде табылған беделге қатты сенеді. Олар өз үлгісімен басқарады, адалдық пен мақсатты шыншылдықты көрсетіп, жалқаулық пен алаяқтықты мүлдем қабылдамайды. Егер біреу қара жұмысты мінез қалыптастырудың керемет тәсілі деп айтатын болса, ол міндетті түрде ESTJ болар еді.

Бұл тұлға типі өз айналасын жақсы сезініп, нақты, дәлелденген фактілер әлемінде өмір сүреді. Өз білімдеріне деген сенімділіктері соншалық, қарсылық күшті болса да, өз қағидаларын ұстанып, не дұрыс, не бұрыс екені туралы айқын көзқарастарын алға тартады. Олардың пікірлері бос сөз емес – ESTJ-лер ең күрделі жобаларға да белсенді араласып, іс-әрекет жоспарларын жетілдіріп, жолшыбай егжей-тегжейлі мәселелерді реттей отырып, тіпті ең күрделі тапсырмаларды да оңай әрі қолжетімді етіп көрсете алады.

Алайда, ESTJ-лер жалғыз жұмыс істемейді және олар өздерінің сенімділігі мен еңбекқорлығының қарымта болғанын күтеді – бұл тұлға түрі өз уәделерін орындайды, ал егер серіктестері немесе әріптестері біліксіздік, жалқаулық немесе одан да жаманы, алдау арқылы оларға қауіп төндірсе, олар өз көңілі қалғанын көрсетуден тартынбайды. Бұл оларға қатал деген атақ әкелуі мүмкін, бірақ бұл ESTJ-лердің қыңыр болғандығынан емес, керісінше олар осы құндылықтар қоғамның жұмыс істеуіне септігін тигізеді деп шын сенетіндіктен.

Үлкен жауапкершілік

ESTJ тұлға түріне ие адамдар үшін басты сынақ – барлығы бірдей жолмен жүрмейтінін және бірдей үлес қоса бермейтінін мойындау. Нағыз көшбасшы жеке адамдардың да, топтың да күшін танып, олардың идеяларын ортаға қосуға мүмкіндік береді. Осылайша ESTJ-лер барлық фактілерді біліп, баршаға қолайлы жолмен ұжымды алға жетелеуі мүмкін.