Mantiqchi INTP-A / INTP-T
Muhimi, savol berishdan toʻxtamaslik. Qiziquvchanlik mavjudligining oʻz sababi bor.
Mantiqchilar (INTP) oʻzining noyob nuqtayi nazari va kuchli aqli bilan faxrlanadi. Ular olamning hamma sinoatini topishda yordam bera olmaydi, aynan shu orqali barcha davrlarning eng nufuzli faylasuflari va olimlari nega aynan mantiqchilar boʻlgani izohlanadi. Mazkur shaxsiyat turi juda kam uchrasa-da, mantiqchilar oʻz ijodkorligi va kashshofligi bilan olomondan ajralib turishdan qoʻrqmaydi.
Aqliy hayot
Mantiqchilar koʻpincha oʻy-xayollarga choʻmib ketadi va har doim ham yomon maʼnoni anglatmaydi. Bunday shaxsiyat turiga ega odamlar deyarli hech qachon oʻylashdan toʻxtamaydi. Uygʻonishi bilanoq ular ongida gʻoyalar, savollar va tushunchalar aylanib turadi. Baʼzida ular xayolan hatto toʻlaqonli munozaralar olib borishi ham mumkin.
Tashqaridan qaraganda, mantiqchilar bitmas-tuganmas xayollarda yashayotgandek koʻrinishi mumkin. Ular oʻychan, xayolparast va biroz vazmin odamdek koʻrinadi. Bu ular aqliy quvvatining barchasini joriy ishlarga yoki maʼlum odamga qaratmagunicha sodir boʻladi va bu hamma uchun biroz noqulaylik keltirishi mumkin. Ammo ular qaysi rejimda boʻlishidan qatʼi nazar, mantiqchilar introvertlar qatoriga kiradi va uzoq muloqot ularni toliqtiradi. Uzun kundan keyin ular oʻz fikri bilan mashgʻul boʻlish uchun yolgʻizlikka intiladi.
Shu oʻrinda mantiqchilarni dushman yoki badjahl deb atash xato boʻladi. Aqliy salohiyati boʻyicha yaqin keladigan odam bilan gaplashishni boshlasa, ular porlab ketadi va ularning fikri biridan ikkinchisiga sakrashni boshlaydi. Fikr almashish yoki boshqa qiziquvchan va izlanuvchan odam bilan jonli munozaradan zavqlanish kabi juda kam narsalargina ularga quvvat bera oladi.
Bu juda oddiy, qadrdon mantiqchim
Mantiqchilar qonuniyatlarni tahlil qilishni sevadi. Oʻzi buni bilmasa ham, Sherlok Xolmsdagi kabi nomuvofiqlik va buzilishlarni payqash qobiliyatiga ega. Boshqa soʻz bilan aytsak, ularni aldash yaxshi fikr emas.
Ajablanarlisi shundaki, mantiqchilarning hamma soʻzlariga ham ishonaverish kerak emas. Ular kamdan-kam hollarda insofsizlik qiladi, lekin ularning jonli ongi koʻpincha oxirigacha oʻylanmagan gʻoyalar va nazariyalarga toʻlib ketadi. Ular dam olish kunlaridagi rejalaridan tortib, asosiy axloqiy tamoyilgacha boʻlgan jihatlarga qadar, hatto hammasi hal boʻlganda ham oʻzgartira oladi. Bundan tashqari, munozarani qizdirib turish uchun ular tullak advokat rolini oʻynashdan ham zavq oladi.
Mantiqchilar kun boʻyi gʻoyalar va imkoniyatlar haqida oʻylaydi va koʻpincha aslida shu bilan band boʻladi ham. Shu bilan bir vaqtda, bu gʻoyalarni roʻyobga chiqarishga qaratilgan har kunlik ishlarni bajarishga har doim ham oshiqmaydi. Xayriyatki, murakkab va koʻp qatlamli muammoni tahlil qilish va uning ijodiy yechimini topish haqida gap ketsa, juda kam shaxsiyat turlari mantiqchilarning ijodiy dahosi va salohiyati bilan bellasha oladi.
Borliq sinoatlari
Bunday shaxsiyat turiga ega odamlar butun olamni tushunishni xohlaydi, lekin faqat bir soha – inson tabiati ularga jumboq boʻlib qoladi. Ismi jismiga mos mantiqchilar faqat mantiq va oqillikda oʻzini erkin sezadi. Natijada, his-tuygʻular odamlarning xatti-harakatlariga, jumladan, oʻzining xatti-harakatlariga taʼsir qilayotgani naqadar mantiqsiz va noratsional ekanidan hayratda qolishi mumkin.
Bu mantiqchilarning hissiz ekanligini anglatmaydi. Bu shaxslar odatda oʻz doʻstlari va yaqinlariga hissiy yordam berishni xohlaydi, lekin buni qanday qilinishini har doim ham bilavermaydi. Ular qoʻllab-quvvatlashning eng yaxshi va eng samarali usulini tanlay olmasligi sababli, biror soʻz aytish yoki biror narsa qilishdan koʻra oʻzini tiyib turishni afzal koʻradi.
Mazkur "tahlil falaji" mantiqchilar hayotining koʻplab jabhalariga taʼsir koʻrsatadi. Mazkur shaxsiyat turiga ega odamlar hatto eng ahamiyatsiz qarorlar ustida ham bosh qotirib oʻtirishi mumkin. Bu ularga samarasizlik va bir joyda turib qolganlik hissini beradi: ular ongidagi fikrlarning cheksiz paradidan shunchalik charchashganki, bu ularning maqsadga erishishida toʻsiq vazifasini oʻtay boshlaydi.
Mantiqchilarning yaxshi jihati shundaki, ular bu berk koʻchada uzoq qolib ketmaydi. Ularning noyob kuchli jihatlari onda-sonda ular kirib qoladigan bu berk koʻchadan chiqib ketish uchun zarur barcha vositalarni oʻz ichiga oladi. Mantiqchilar oʻzining ijodkorligi va xolisligidan foydalanib, oʻz salohiyati – mutafakkirlik va har tomonlama barkamollikni toʻliq namoyish qila olishi mumkin.