Ակտիվիստ
Ինձ չի հետաքրքրում, թե ինչ եք անում ձեր ապրուստի համար։ Ես ուզում եմ իմանալ՝ ինչի համար եք տենչում և արդյոք համարձակվո՞ւմ եք երազել հանդիպելու ձեր սրտի ծարավին։
ENFP տիպի (Ակտիվիստ) մարդիկ իսկական ազատ հոգիներ են – բաց, ընկերասեր և լայնախոհ։ Կյանքի հանդեպ իրենց կենսուրախ և լավատեսական մոտեցմամբ ENFP-ները առանձնանում են ցանկացած բազմության մեջ։ Չնայած նրանք ուրախությամբ կարող են լինել ցանկացած երեկույթների «ոգին», նրանք միայն ուրախ ժամանցով չեն ապրում։ Այս անձնային տիպերն ունեն խորը շերտեր, որոնք սնվում են ուրիշների հետ խոր և զգացմունքային կապեր հաստատելու իրենց ուժգին ցանկությամբ։
Առօրյա կյանքի կախարդանքը
ENFP անձնավորություններն ունեն անհոգ ընկերասիրության, փայլուն երևակայության և խորը, խոհուն ներհայեցողության հետաքրքիր համադրություն։ Նրանք կանոնավոր կերպով օգտագործում են իրենց բնական հետաքրքրասիրությունն ու ընդարձակ ստեղծարարությունը՝ փորձելով ավելի լավ հասկանալ իրենց և մարդկային հարաբերությունների բարդ դինամիկան։ Եվ նրանք իսկապես նվիրված են իրենց հարաբերությունների զարգացմանը և աշխարհի ընդհանուր ընկալման խորացմանը։
ENFP-ները յուրահատուկ կերպով են ինքնադիտարկում իրենց, առաջնորդվելով երևակայությամբ, զարմանքով և այնպիսի բաների հանդեպ հավատով, որոնք միշտ չէ, որ կարելի է բացատրել տրամաբանորեն։ Այս անձնության տիպի մարդիկ իսկապես հավատում են, որ ամեն ինչ՝ և ամեն ոք, փոխկապակցված են, և նրանք ապրում են այդ կապերից ստացվող ներըմբռնման փայլատակումների համար։ Նրանք հավատում են, որ միմյանց հետ վարվելու ձևը իսկապես կարևոր է։ Փաստորեն, ENFP-ները ամենահավանական անձնության տիպն են, որ հավատում են կարմայի գաղափարին։
Երբ ինչ-որ բան վառում է նրանց երևակայությունը, ENFP-ները ցուցաբերում են վարակիչ ոգևորություն։ Այս անհատականությունները չեն կարող չճառագել դրական էներգիա, որը գրավում է մյուս մարդկանց։ Հետևաբար, նրանք կարող են հայտնվել այնպիսի իրավիճակում, երբ հասակակիցները նրանց առաջնորդ կամ ուսուցիչ են համարում։ Սակայն, երբ ներշնչանքի սկզբնական ալիքն անցնում է, ENFP-ները կարող են դժվարություններ ունենալ ինքնակարգապահության և հետևողականության հետ՝ կորցնելով եռանդը այն նախագծերի հանդեպ, որոնք ժամանակին այդքան կարևոր էին իրենց համար։
Ուրախության որոնում
ENFP անձնային տիպերն ապացուցում են, որ փնտրել կյանքի ուրախությունն ու հաճույքները դեռ չի նշանակում լինել մակերեսային։ Կարծես մի ակնթարթում, այս անձնային տիպի մարդիկ կարող են վերածվել խանդավառ երազողներից անհոգ պարողների։
Նույնիսկ ամենազվարճալի պահերին ENFP-ները շարունակում են ձգտել զգացմունքային կապի։ Այս անձնավորությունների համար քիչ բաներ են ավելի կարևոր, քան անկեղծ, սրտաբուխ զրույցները իրենց սիրելի մարդկանց հետ։ Նրանց համար կարևոր է, որ յուրաքանչյուր ոք հնարավորություն ունենա արտահայտելու սեփական հույզերը, իսկ նրանց ջերմությունն ու կարեկցանքը հնարավորություն է տալիս անգամ ամենամեկուսացված մարդկանց բացվել։
Պետք է զգույշ լինել, սակայն, որովհետև ENFP-ների ինտուիցիան երբեմն կարող է ստիպել նրանց սխալ գնահատել ուրիշների գործողությունների իրական շարժառիթները։ Փոխանակ ուղղակի հարցնելու, թե ինչ է մտածում կամ զգում մարդը, ENFP-ները երբեմն տարվելով փորձում են «գուշակել» և արդյունքում անհանգստանում են։
ENFP-ները երկար ժամանակ են տրամադրում տարբեր հարաբերությունների, զգացմունքների և գաղափարների ուսումնասիրմանը, մինչև որ գտնում են իրենց կյանքի ճիշտ ուղին։ Սակայն երբ վերջապես գտնում են իրենց ճանապարհը, նրանց երևակայությունը, կարեկցանքը և խիզախությունը կարող են լուսավորել ոչ միայն իրենց սեփական կյանքը, այլ նաև իրենց շրջապատող աշխարհը։