Քարոզիչ ENFP-A / ENFP-T
Ինձ չի հետաքրքրում, թե դու ինչպես ես ապրուստդ վաստակում: Ես ուզում եմ իմանալ, թե ինչն է սրտիդ ստիպում զարկել, և թե արդյոք դու այնքան համարձակ ես, որ լսես սրտիդ ձայնը։
Քարոզիչներն (ENFP) իսկական ազատ ոգիներ են՝ շփվող, սրտաբաց և լայնախոհ: Կյանքի հանդեպ իրենց աշխույժ, ուրախ մոտեցումով նրանք աչքի են ընկնում ցանկացած ամբոխի մեջ: Բայց չնայած նրանք կարող են լինել ընկերախմբի ոգին, քարոզիչները չեն մտածում միայն լավ ժամանակ անցկացնելու մասին: Անհատականության այս տեսակները խորն են, ինչպես նաև խորն է այլոց հետ իմաստալից, էմոցիոնալ կապ ունենալու նրանց ձգտումը:
Առօրյա կյանքի կախարդանքը
Լինելով ընկերասեր և շփվող՝ քարոզիչները ձգտում են ավելի լավը դարձնել իրենց հարաբերություններն ու սոցիալական կյանքը: Բայց իրենց շփվող, հեշտ լեզու գտնող արտաքինի հետ մեկտեղ նրանք ունեն նաև հարուստ, բազմազան ներքին կյանք: Առանց երևակայության, կրեատիվության և հետաքրքրասիրության առողջ չափաբաժնի, քարոզիչը պարզապես չի լինի քարոզիչ։
Իրենց յուրօրինակ ձևով քարոզիչները կարող են լինել բավականին ինտրոսպեկտիվ: Նրանք չեն կարող չմտածել կյանքի ավելի խորը իմաստի և նշանակության մասին, նույնիսկ երբ նրանք պետք է ուշադրություն դարձնեն այլ բանի: Այս անհատականությունները հավատում են, որ ամեն ինչ և բոլորը կապված են, և նրանք ապրում են այն ամենի համար, ինչ կարող են ստանալ այս կապերից։
Երբ ինչ-որ բան բորբոքում է նրանց երևակայությունը, քարոզիչները կարող են դրսևորել խանդավառություն, որը շատ վարակիչ է: Այս անհատականությունները դրական էներգիա են տալիս, որը գրավում է այլ մարդկանց, և քարոզիչները կարող են ընկալվել իրենց հասակակիցների կողմից որպես առաջնորդ կամ գուրու: Բայց երբ ոգեշնչման սկզբնական փուլն անցնում է, քարոզիչները կարող են դժվարություններ ունենալ ինքնակարգավորման ու կայունության հետ՝ նախկինում այդքան մեծ նշանակություն ունեցող նախագծերիվ հետ մնալով:
Փնտրելով երջանկություն
Քարոզիչներն ապացույցն են այն բանի, որ կյանքում ուրախություն ու հաճույք փնտրելը նույնը չէ, ինչ մակերեսային լինելը: Թվում է, թե մեկ ակնթարթում այս անհատականության տեր մարդիկ կարող են կրքոտ իդեալիստներից վերածվել անհոգ կերպարների։
Նույնիսկ զվարճանքի պահերին քարոզիչները ցանկանում են էմոցիոնալ կապ հաստատել ուրիշների հետ: Անհատականության այս տեսակների համար շատ քիչ բան է ավելի կարևոր, քան անկեղծ, սրտանց խոսակցություններն իրենց սիրելի մարդկանց հետ: Քարոզիչները կարծում են, որ բոլորն արժանի են իրենց զգացմունքներն արտահայտելու, և նրանց կարեկցանքն ու ջերմությունը ստեղծում է տարածք, որտեղ նույնիսկ ամենաամաչկոտ մարդիկ կարող են իրենց հարմարավետ զգալ բացվելու համար:
Այնուամենայնիվ, այս անհատականության տեսակն ունեցող մարդիկ պետք է զգույշ լինեն: Քարոզիչների ինտուիցիան կարող է ստիպել նրանց չափազանց շատ խորանալ այլ մարդկանց գործողությունների և վարքագծի մեջ: Պարզապես բացատրություն խնդրելու փոխարեն՝ քարոզիչները կարող են տարակուսել ուրիշի ցանկությունների կամ մտադրությունների շուրջ: Այս տեսակի սոցիալական սթրեսն այն է, ինչը ներդաշնակության վրա կենտրոնացած քարոզիչներին չի թողնում քնել։
Քարոզիչները շատ ժամանակ են ծախսում՝ ուսումնասիրելով տարբեր հարաբերություններ, զգացմունքներ և գաղափարներ, նախքան իրենց կյանքի համար ճիշտ ճանապարհը գտնելը: Բայց երբ նրանք վերջապես գտնեն իրենց ճանապարհը, նրանց երևակայությունը, կարեկցանքն ու քաջությունը կարող են լուսավորել ոչ միայն իրենց կյանքը, այլև շրջապատող աշխարհը: