INFJ (Vəkil) şəxsləri empatiya ilə idealizmin və möhkəm mənəvi kompasın unikal bir qarışığına sahibdirlər. Bu keyfiyyətlər həmin insanları etibarlı dost, həmkar və icma üzvü edir – hər kəs onlara güvənə biləcəyini yaxşı bilir. Fəqət, elə bu xüsusiyyətlər sərhədlər qoyanda və istəkləri rədd edəndə bəzi çətinliklər yarada bilər.
Çox INFJ üçün yox demək başqalarına kömək etmək istəyi ilə özünə qayğı ehtiyacı arasında konflikt kimi hiss oluna bilər. Bir çoxu, dəyərlərinə uyğun olmayan şeylərə razılaşdıqlarını və ya öz rifahları hesabına çox yükləndiklərini görə bilərlər. Nəzakətlə və özünəinamla yox deməyi öyrənmək, bu şəxslərin inkişaf etdirməli olduğu əsas qabiliyyətdir; beləliklə, onlar həm öz ehtiyaclarını qoruyar, həm də münasibətlərinin dürüstlüyünü saxlayarlar.
Şəxsiyyətin yox demək tərzimizə necə təsir göstərdiyini ümumi şəkildə bilmək üçün, məqaləmizə baxın: “Necə nəzakətlə yox demək olar: şəxsiyyət və sərhədləri ünsiyyətlə bildirmə sənəti”.
Bu məqalədə INFJ-lərin yox deyəndə qarşılaşdığı xüsusi çətinlikləri nəzərdən keçirəcəyik və onların sərhədlərini cəsarətlə qorumağa kömək edəcək üsulları təqdim edəcəyik. Şəxsiyyətlərini dərin anlayaraq və səmərəli texnikaları mənimsəməklə, INFJ-lər gələn xahişləri idarə etmək və şəxsi sərhədləri qorumaqda balanslı yanaşma əldə edə bilərlər.
INFJ-lərin yox deməkdə üzləşdiyi çətinlikləri başa düşmək
İnsanların yox deməsini şəxsiyyət nəzəriyyəsi prizmasından araşdıranda görmək olar ki, hər bir şəxsiyyət xüsusiyyəti fərdlərin başqaları ilə münasibətinə, qərarlarını necə ifadə etdiyinə və sərhədlərini necə saxladığına təsir edir.
İntuitiv və Planlı şəxslər kimi INFJ-lərin ümumiyyətlə uzunmüddətli məqsədləri barədə aydın baxışları olur. Bu xüsusiyyətlər həm də INFJ-lərin həyatlarını yönləndirən möhkəm dəyərlərin əsasını təşkil edir. Onlar nə istədiklərini, nəyə inandıqlarını və nəyə ehtiyac duyduqlarını yaxşı bilirlər (və hədəflərinə necə çatacaqlarını da), nəticədə, istəklə onların etikası və böyük planları arasında ziddiyyət yarananda bunu dərhal hiss edirlər.
İntuitiv və Hissiyyatlı xüsusiyyətlərinə görə INFJ-lər başqalarının enerjisinə və emosiyalarına olduqca həssas yanaşırlar. Sərhəd qoyanda, yaxud istəyi rədd edəndə, adətən, hörmət etdikləri və dəyər verdikləri insanları məyus etməklə və ya münasibətlərdə konflikt yaratmaqla bağlı narahat olurlar. Sosial harmoniyanı önəmli sayırlar və kiminsə istəyinə yox demək bu harmoniyanı təhlükəyə ata bilər.
INFJ-lərin İntrovert təbiəti onlarda təkcə konfliktlərdən yayınmağa üstünlük vermələrində deyil, həm də başqalarının istəklərinə cavab verərkən enerji itirmələrində üzə çıxır. Yox demək özü çox yorucu ola bilər və bəzən diplomatik davranış kimi və ya sadəcə enerjilərini çox almadan söhbəti bitirmək məqsədilə bəli deməyə razılaşa bilərlər.
Burada Qətiyyətli və Təlatümlü şəxsiyyət tipləri arasındakı fərqləri də qeyd etmək vacibdir. Təlatümlü INFJ-lər tez-tez özlərinə şübhə ilə yanaşır və tənqidə qarşı daha həssas olurlar; bu da onlara yox deməyi çətinləşdirir. Qətiyyətli INFJ-lər isə özlərinə daha çox güvənir, tənqidə daha az həssasdır və qərarlıdırlar – nəticədə, onlara yox demək bir qədər asan olur.
Qətiyyətli INFJ-lərlə Təlatümlü INFJ-lər arasında çox fərqlər var. Ətraflı oxumaq üçün bu məqaləyə baxın.
INFJ-lərin təsirli şəkildə yox deməsi üçün 4 üsul
Artıq INFJ-lərin yox deməkdə qarşılaşdığı spesifik çətinlikləri nəzərdən keçirdik, indi isə praktik həllərə baxaq. Rədd cavabı vermək çətin ola bilər, amma unutmaq olmaz ki, sərhəd qoymaq bir bacarıqdır və bacarıqlar da vaxtla inkişaf edir. Aşağıdakı strategiyalar INFJ-lərin güclü tərəflərinə və üstünlük verdiyi yanaşmalara uyğun hazırlanmışdır; bu da onlara həm empatik xüsusiyyətlərini, həm də şəxsi ehtiyaclarını qoruyaraq yox deməyə kömək edəcək.
Bu üsulları tətbiq etməklə, INFJ-lər sərhəd qoymağı özlərinəinamla öyrənə və dəyərləndirdikləri ahəngdarlığı və dürüstlüyü münasibətlərində qorumağa davam edə bilərlər.
1. Fərdi missiya bəyanatı hazırlayın
INFJ-lər əsas dəyərlərini, məqsədlərini və prioritetlərini əks etdirən aydın şəxsi missiya bəyanatı hazırlamalıdırlar. Bu, onlar üçün həyatda ən mühüm olanların və nəyə nail olmaq istədiklərinin qısa xülasəsi olmalıdır. Hər hansı bir istək gəldikdə, INFJ-lər bu bəyanatdan rəhbər tutaraq qərar verə bilərlər: razılaşmaq mı, yoxsa rədd etmək? Əgər xahiş onların missiyası ilə ziddiyyət təşkil edirsə və prinsipiallarından imtina etmələrini tələb edirsə, bu zaman özlərinə sadiq qalaraq əminliklə rədd edə bilərlər.
Qərarlarını şəxsi missiya bəyanatına əsaslanaraq vermək onlara həm möhkəm dayaq, həm də qərar məntiqində aydınlıq və məqsədlilik verir. INFJ-lər böyük ehtimalla görəcəklər ki, bu bəyannamə rədd cavabı verdikdə mövqelərini izah etməyi və qarşı tərəfə niyə belə davrandıqlarını anlatmağı asanlaşdırır. Zaman keçdikcə, missiyalarını davamlı və aydın şəkildə ortaya qoymaq INFJ-lərə ətrafdakılarda doğru gözləntilər formalaşdırmağa kömək edəcək; insanlar onların dəyərləri və məqsədlərindən yola çıxaraq nə gözləməli olduqlarını öyrənəcəklər.
2. Baxış bucağınızı dəyişin
Bəzi INFJ-lər yox deməyi birmənalı olaraq mənfi bir şey kimi görürlər. Bu yanlış düşüncəni dəyişmək üçün sərhəd müəyyənləşdirməyə baxışı başqa cür qurmaq lazımdır. Yox demək – eqoistlik deyil, əslində, önəm verdiklərimizə yer açmaq yoludur. Bu düşüncə tərzi dəyişəndə INFJ-lər üçün sərhəd çəkmək və öhdəlikləri idarə etmək tamam fərqli mənzərə alır.
Prioritetlərinə uyğun gəlməyən istəkləri rədd etməklə INFJ-lər daha dəyərli fəaliyyətlərə və münasibətlərə tam şəkildə qatılmaq fürsətini əldə edirlər. Bu cür baxışla yox demək imtina deyil, dəyərləri təsdiqləmək və şəxsi inkişafa sərmayə qoymaq anlamı qazanır. Birinə yox deyərkən, əslində, başqa bir şeyə bəli demiş olurlar. Bu yanaşma nəticə etibarilə hər kəs üçün faydalıdır, çünki INFJ-lər zaman və enerjilərini özləri üçün daha həqiqətən önəmli olan sahələrə yönəldə bilirlər.
3. Rol modellərinizi müəyyənləşdirin
INFJ-lərin istifadə edə biləcəkləri başqa bir üsul isə, sərhəd qoymaqda və dəyərlərinə sadiq qalmaqda uğurlu olan şəxslərdən nümunə götürməkdir. Bu insanlar tanınmış simalar, mentorlar, dostlar, ailə üzvləri və ya şəxsən tanıdıqları başqaları ola bilər. Başqalarının sağlam sərhədləri necə qoruduğunu müşahidə etməklə INFJ-lər yeni ideyalar və öz şəxsiyyətlərinə, şəraitlərinə uyğunlaşdırıla biləcək praktik yanaşmalar öyrənə bilərlər.
Rol modellər INFJ-lər üçün öz sərhədlərini zərif şəkildə ifadə etməkdə qiymətli ilham və təlimat mənbəyidir. INFJ-lər rol modelləri müşahidə edərkən onların şəxsi ehtiyaclarla məsuliyyət və münasibətlərini necə tarazladığına diqqət etməlidir. Buraya həmçinin xahişləri necə rədd etdikləri və ya sərhəd qoyduqları zaman hansı dili seçdikləri və bütün bunları hörmət və empati ilə necə etdiklərinə baxmaq da daxildir. Həmçinin, mümkün və məntiqli olsa, INFJ-lər bu insanlarla sərhədqoyma təcrübələrini müzakirə etmək üçün əlaqə saxlaya bilərlər. Onların şəxsi hekayələri və məsləhətləri, ehtimal ki, daha inamlı və qətiyyətli ünsiyyət bacarıqlarının inkişafı üçün faydalı tövsiyələrlə zəngin olacaq.
4. Özünü təsdiqləmə praktikasını edin
Yox demək mövzusunda daha inamlı olmaq istəyən INFJ-lər, öz güclü tərəflərini, dəyərlərini və nailiyyətlərini mütəmadi şəkildə xatırlatsalar, yaxşı olar. Özünü təsdiqləmə praktikası, başqalarının ehtiyacına özündən çox əhəmiyyət verən insanlar üçün xüsusilə vacibdir.
INFJ-lərin, həmçinin daha öncə hansı vəziyyətlərdə sərhəd qoymağı uğurla bacardıqlarını xatırlamaları və bu addımlarını qeyd etmələri də kömək edir – uğurun böyüklüyü fərq etməz. Bu, məsələn, peşman olmadan “yox” deyə bildikləri situasiyaları yada salmaq, ya da çətin söhbətlərdə dəyərlərinə xələl gətirmədən məqbul nəticə əldə etdikləri halları qeyd etmək ola bilər. Uğurlarını qəbul etmək INFJ-lərdə lazım olanda inamla və özünə güvənlə yox demək üçün daxili güc formalaşdırır.
Bəzi INFJ-lər bəzən həddən artıq tez-tez yox deyə bilər
Yox deməyi öyrənmək INFJ-lər üçün nə qədər vacibdirsə, sərhədləri həddən artıq sərt tutmağın riskini də anlamaq bir o qədər əhəmiyyətlidir. Yuxarıda qeyd edildiyi kimi, INFJ-lər möhkəm mənəvi kompasla hərəkət edir və idealizmləri bəzən qərar vermədə “ya hamısı, ya heç nə” prinsipinə gətirib çıxarır. Bu, onları çox tez-tez yox deməyə və ya əslində özləri və başqalarının xeyrinə ola biləcək xahişləri rədd etməyə sövq edə bilər. Dəyərlərə sadiqliklə yeni təcrübə və fikirlər üçün açıq olma arasında düzgün balans tapmaq vacibdir.
Çox sərt olmamaq üçün INFJ-lər hər bir istəyi və ya imkanı diqqətlə, öz dərəcəsində dəyərləndirə bilərlər. Burada özlərinə sual vermək olar: “Bəli demək münasibəti gücləndirərmi, şəxsi inkişafa apararmı, ya da daha böyük bir xeyirə xidmət edərmi?” Bəzən də rahatlıq zonasından çıxmağa hazır olmaq lazımdır, xüsusən onun faydası mümkün risklərdən daha böyükdürsə. INFJ-lər üçün yadda saxlamaq faydalı olar ki, prinsiplər çox vacib olsa da, bəzən esneklik və uyğunlaşma da eyni dərəcədə dəyərlidir. Sərhədləri qorumaqla yanaşı, mümkün imkanlara da açıq qalmaq sağlam bir balansdır və nəticədə INFJ-lər həm dəyərlərinə sadiq, həm də şəxsi, peşəkar inkişaflarına töhfə verən qərarlar verə bilərlər.
Sonda
Əslində, yox deməyi öyrənmək INFJ-lər üçün şəxsi inkişaf imkanına çevrilir. Bu, empatiya, idealizm və vacib olan özünə qayğı ehtiyacı arasında incə balans tapmağı tələb edir. Şəxsi missiya bəyanatı formalaşdırmaq, baxış tərzini dəyişmək, rol modelləri tapmaq və özünü təsdiqləmə praktikasını etmək – bütün bunlar bu şəxslərin sərhəd qoymaq üçün lazım olan özünəinamı və bacarıqları formalaşdırmağa imkan verir.
Əminlik və zərifliklə yox demək sənətini ustalıqla mənimsəmək INFJ-lərin şəxsi rifahını qorumağı və həqiqətən önəm verdikləri insanlarla və işlərlə daha səmimi və dərin münasibətlər qurmağı asanlaşdırır.
Siz INFJ-siniz? Əgər belədirsə, yox demək sahəsində hansı vərdişləriniz var? Özünüzü başqalarının könlünü xoş tutmağa meylli sayırsınız, yoxsa sərhədlərinizi qoruyanda daha sərt davranmağa meyllisiniz? Rəylərinizi və müşahidələrinizi aşağıda şərh bölməsində paylaşa bilərsiniz.
Əlavə oxu
- Özünü ifadə, sərhədlər və sevgi: Vəkil (INFJ) və səsini ucaltmağın narahatlığı
- Cəsur Vəkil (INFJ)
- Şəxsiyyət və iş yerində səmərəli ünsiyyət
- Vəkillər (INFJ) üçün ən böyük stress mənbələri hansılardır?
- INFJ-lər barədə – ya da ümumiyyətlə, 16 şəxsiyyət tipi barədə daha çox məlumat almaq istəyirsiniz? 16Personalities Pro Suite ilə bütün şəxsiyyət tipləri ilə bağlı tədqiqat və biliklərimizə tam çıxış əldə edin.